اللواء البشر : مدتها عشر سنين

 

اللواء البشر : مدتها عشر سنين

هنّ اللي مايسدد غراماته من اول شهر


هذا اللواء فهد بن سعود البشر، مدير الإداره العامه للمرور بالرياض، قال بمؤتمر صحفي كم شغله مهمه علشان نظام المرور الجديد واللي وافق عليه وزير الداخليه الأمير نايف بن عبد العزيز،، وياويل اللي يخلخله أو مايمشي على اللي حنا نقوله ..

من أهم القرارات تمديد وقت الرخصه بدال ماكانت 5 سنوات صارت 10 سنين (زي بطاقة الاحوال يعني )، وقال ان المرور يبوون يفتحون مدارس أهليه عشان الغشمان اللي مايديرون السواقه ومسببين حوادث لخلق الله نعلمهم وندرسهم عشان يخفون بعد الله من هالحوادث والغشامه..

ومن القرارات بعد اننا نبي نحوس اي واحد يجدع له ورقه او منديل او زقاره من الدريشه أو من عند الباب (ليتكم تركزون على اللي يفتحون الباب ويمارسون بعض القوس المقرفه مثل البصق اعز الله القارين والسامعين) خصوصاً اننا جالسين نطبق نظام النقاط واللي كل مازادن هالنقاط السوداء على رخصة السواق كل ما صار اردى له ليين تسحب رخصته وتحجز سيارته بوادي لبن أو يسحبون الرخصه ويقولون له رح تعلم السواقه من جديد واترك الغشامه عنك ومتى ماعرفت تسوق عطيناك رخصه..

وقال بعد اننا نبي نحدد وقت من نزول المخالفة على المخالف، وياويل اللي مايسددها خلال شهر (30 يوم وليلة) ترا نبي نصفقه بغرامه كامله (يعني لو مديور عند اشارة 300 نخليها 900 وهن أحد يفتح فمه) وزود على كذا كلن يقوم ويعلمنا ببياناته الجديده

(طيب يا معالي اللواء،، واللي تجيه مخالفه وهو مايدري وش يسوي اذا راحت عليه المده؟)

غير كذا قال اننا نبي نحط مجلس أعلى للمرور ومشاكل العالم تنحل عن طريق هالمجلس بس اصبروا علينا شويتين لين ينزل امر ملكي عنه.

وبالنسبة للعسكري اللي يوقف العالم لازم انه يغدي سنع ويواجه الناس بزين مظهر وزين نفس، وينزل هو بنفسه للسياره المخالفه يتفاهم معه موب يحتريهم ينزلون عشان يترجونه.. وياويل اللي يخالف هالكلام يا انه يبي يعاقب سواء يسجن أو يفصل من المرور لأنه ماسمع الكلام اللي يجمد على الشارب..

غير ذا وذاك ترا مايحق للعسكري يهايط ويسحب الرخصه من اللي يسوق لأي سبب.

أما عن الحريم وما أدراك مالحريم وسواقتهن وعن الحالات اللي قفطوهن يسوقن، قال اننا مالنا شغل بهالحريم وان مالنا صلاحين نحتسي ونقول شي كوننا ادارة تنفيذية مايمدينا نقول سووا وافعلوا، لا .. هذا شغل مجلس الشورى جاز لهم الوضع رفعوه لمجلس الوزراء ماجاز لهم قفلوا الموضوع وصلى الله وبارك .. لكننا نبي نمشي على النظام .. والنظام يقصد السواق سواء كان رجال أو حرمه.. (يعني الغرامه فيك فيك لوك مخالف/ـه)

ونتمنى السلامه للجميع ..

المصدر: منتدى الخليج