بعض الشباب

قـائـمـة الأوسـمـة · #1

هذه الجولة تصف بعض أقول بعض الشواذ من الشباب
هداهم الله

فأهلا وسهلا بكم في هذه الجولة السياحية في ربوع شباب بلادي ..
والتي استهلها ببعض شباب مكة

بعض شباب مكة :
معروفين بالمشاكل والمضاربات ..

ومن شروط المضاربه لديهم أنه يكون لديك ساطور أو سكين ..

وياويلك اذا دخلت حارة وعملت مشكله مع اي واحد منهم ..
صدقني وقتها راح ينزل لك منتخب كامل زي منتخب نيجيريا.

بس للأمانة فهم شباب دمهم خفيف مبسوطين دائماً ..
مايعترفوا بكلمة مااقدر..
يعني لو قلت لاي واحد منهم هيا بنا نمرح .......
يقولك: "اوف كوررس" وفي رواية قدام
ومفردهم مكاوي وجمع المذكر السالم مكاويين

ومن العبارات الشائعة لديهم مثل ... "ودين صلاة امي" ....
"ياواد سيب الهيامه" .. "استنا شويه " دحينا اهرجوووو"... مكة حقنا

ويا حبهم للفلسفه .. في كل شي عارفين .....
وما فيه احد تسآله ويقولك ما اعرف

إهتمامات البعض منهم منصبه على كرة القدم مع انه ماادري فين يلعبوها ....

كل الدنيا عندهم جبال .. الترفيع بدباب

آخرة الإستعراض من غشييم

شباب الطائف :
سهل التعرف عليهم بدون الحاجه إلى معامل مخبرية او تشريح ..
راح تعرفهم من طريقة لبسهم للطاقيه ...
من شروط اختيار الطاقية المناسبة أن يكون إرتفاعها 150سنتيمتر
وعرضها 5 سنتيمتر ..

لما تمشي بينهم تحس انك ماشي بين ناطحات سحاب مو بشر ويرتدون طواقي

مشاء الله عليهم دائماً تجد فيهم النشاط والحيويه لدرجة انهم مايناموا في الليل

وعندهم منطقة مشهوره على نطاق دول الخليج الا وهي الحوية ...

ويتصف شباب الطائف بأنه البعض منهم عدواني..

واذا مثلاً صادف انه عينك جات في عينه ..
راح يتمدد صدره ويشمر عن ساعديه ويقولك : خير!! ايش فيك تطالع ؟؟

وعليهم محشات رهيبه لاتفوتكم.. وكله كوم والسواقه عندهم كوم ..

تحس انهم جالسين يلعبو ..... القيادة فن وذوق وأخلاق

لكن عندهم القيادة لا فن ولا ذوق ولا أخلاق .....
وجع ايش ذا كله لاااا .. اجل كلكم راسبين

احلام البعض منهم: التخرج من الثانوية العامة بتقدير جيد
ويشتري دباب اربع كفرات ويشتغل عليه

او يشتري قراندي موديل 88 ويسدح خشمها بالارض وهاتك تلميع في الكفرات والصدام ..بزيت فرامل ومن ثم التوجه الى منتزه الردف ويجب أن يكون بحوزته
شريط لمزعل فرحان او فهد بن سعيد

نصيحة: إذا كنت مدرس في الطائف فخليك أخلاق واعطي درجات
والا والله تنجلد في الصرفه

شباب جــدة:
اهلا وسهلاً ..
بما أني عايش بينكم فما راح اوفيكم حقكم من الحش .....
قصدي الحديث عنكم

منتشر بين البعض منهم الكذب بصورة كبيرة ومخيفه ..
حدثني احد الزملاء قائلاً اسكت يافلان امس رقمت خمسة بنات ورا بعض

ويجيد شباب جدة فن التعامل بلغة الأصابع و التخاطب بالإشارات
وخاصةً عند إشارات المرور

ومن الضروريات في حياتهم ؛ لازم تكون مشبك بنات او تعرف بنات
والا راح تعتبر شاب متخلف وعقليتك لا تتواكب وتتماشى مع متطلبات العصر

وينتشر بينهم الخدم في كل بقعه في كل شبر في كل حفرة في كل شارع في كل شاليه ... وبعدين معاكم انتو في كل محل

وفيه بعض الشباب حاط على صدره 10 كيلو سلاسل على باله راح يطلع صدام جيمس .. وبعضهم يلبس اقمصه عليها شعارات واحرف غريبه
وهوا والله مو داري ايش معناها

اما اهتماماتهم : الفشخره الكذابه – الطفش ..
كل مااجلس مع احد منهم قال طفشان – تشجيع الاتحاد – سرقة الايميلات–
الكذب – المصلحه ... يعني اذا ماكان معاك فلوس ..

والا ما عندك شقة خاصة فيك والا منته مستأجركبينه فمحد راح يعطيك وجه –
مطاردة البنات اما ذي النقطة فهم مبدعين فيها....
نصيحة: لاتذهب هذا المساء من البيت اذا فاز الاتحاد.
صدقني راح تكره حياتك ؛ فالخدم من كل حدب وصوب

شباب بحره:
كل الترفية .. كل الإثارة .. كل الأكشن ..
كل الأسلحة لدى شباب بحره .......
طيب ياشوتايم

البعض منهم اذا طفش مره قام بعملية قنص لعيال الحارة بالرشاش ....
وإذا كان مزكم ومريض يتسلا مع اهله بالرشاش في البيت

ولاحظت في الاونة الاخيرة انحراف بدرجة 360 حسب مقياس (روح اختار)
في تصرف بعض الشباب اللي صاروا يستمعوا لاغاني مايكل .. "أبك ..
ياويلي علاااااك يا ميكل بن جكسون" ... الله يرحم ايام عيسى الاحسائي وحجاب

وحتى كبار السن عندهم مصرقعين ..مره جلست مع شايب مغمور وبدا يسرد علي مقتطفات من مغامراته وفروسيته في الماضي ..
واللي قاهرني انه كل شويه يسب فينا ياشباب اليوم واثناء سرده لاحدى المغامرات الشيقه.. قمت بمقاطعته قائلاً : اخس ياجيمس بوند ..
رد علي بغضب قائلاً : اعقب يابزر النيدو ......
عوذه ... عوذه ..... منكم يابزارين اليوم

ثم سألته ماهو رأيك ياعم في قيادة المرآه للسيارة ؟ في محاولة خبيثه مني لتهدئة الوضع فقمت بالاستعانة بالعنصر النسائي في سؤالي..لزوم الإغراء ....
ايش تعرفوا انتو

اجاب قائلاً : تخسي ثم تخسي ثم تعقب ..... الحريم مالهن الا مطابخهن !! وبعدماحسيت انه الوضع تفجر قلت : ياعم ما كأنه العشاء تأخر؟؟ ......
ايوووووه خلك مؤدب ومالك ومال الخوض في السياسة

نصيحة : اثناء تجولك في ربوع بحره خليك مؤدب وعلى وجهك علامات الحزن والآسى.. لانك لو ابتسمت راح يتم تفسير الابتسامة إلى ابتسامة غير مشروعة ..
وهذي كارثة بحد ذاتها

شباب المدينة:
مدري ليه شايفين نفسهم .. يتكلم شويه وبعدين يقول انا من المدينة ......
على عيني وراسي من المدينة بس اعصابك

وعندهم قهوة مشهوره اسمها ابو .. والله نسيت ..
المهم انها ابو حاجه لو ضربتك فيها لنسدحت صريعا ولكن صدقني راح تحب المدينة بغض النظر عن شبابها لانها مدينة الرسول صلى الله عليه وسلم

نصيحة : بطلووو غزل

شباب ينبع :

بصراحه تخاف منهم ..
فعندهم ثقافة شباب الطائف ومكة وجدة بالاضافة الى ثقافتهم الخاصة والتي تعتبر غريبه .. فإذا كنت ماشي على رجلك في ينبع (ينبع كلها تلفها في خمسة دقائق)
فراح تجد انه الكل يضرب لك بوري ويقولك هاه مشوار ...
و أنا مطنش وعامل نفسي أبكم ابغاهم يريحوني وينقلعوا

نصيحة : انته مهدد بالطفش والأنحراف ..
واحسن حاجه اشتري بلاي ستيشن واجلس في البيت .. ولاتفكر تطلع مره

شباب الرياض :

رأس مالهم الشماغ والعقال .. دائماً لابسينها ..
مشاء الله عليهم مشخصين في كل وقت وفي كل مكان..
تجدهم مشخصين عند الأكل .. عند النوم .. عند الحلاق ..عند الاشارة...

وبعضهم اذا شال الشماغ عن راسه راح تشوف جزر اندونيسيا في راسه......

واصحاب مصانع الاشمغة مستغلين مدى تعلق الشباب بالاشمغه وحبهم لها..
وكل شهر نازل شكل جديد ..

مساكين الواحد ما يلحق يتهنى ويفرح بالشماغ اللي اشتراه

لا تكثر نوم بالبر
وعندهم قمة الترفيه والترويح عن النفس أنه يطلع القهوة مع اصحابه

ويجلس يتفرج على الدش ..
والمكيف شغال وابن امه اللي يفتح فمه

لكن للأمانة ماعندهم خرابيط..... لانهم كذا بالفطره مرتفعين ...
بس انته قول السعوديه فازت ... وتعال شوف الجنان ...

اهتماماتهم .. مشاهدة افلام التفحيط ......
دخول الشات ثم كتابة عبارات غريبه

ومن الإهتمامات .... التسجيل في المنتديات بأسماء معبره مثل:
ضفدع مضيع نظارته,, ضب اطخم ,, دولاب المطبخ

ومن أرقى الإهتمامات: الترقيم وتطفيش البنات و مطاردة الضبان وتعذيبها

نصيحه : لاتلعب معهم ورق (بلوت) ماعندهم تفاهم ..

شويه ويضربوني عشاني سرحت شويه عن اللعب.

شباب القصيم :

بسهوله راح تجدهم وتتعرف عليهم من ملابس بعضهم ..
.. والمشكله يطلع فيها ويروح كل محل ..
المسجد , السوق , الملاهي , الماسنجر
قميص نوم وطاقية

وفيه بعضهم مرررره ماتقدر تاخذ وتعطي معاهم شايفين انفسهم ..
ومره لاغين المنطقة الغربيه من قاموسهم...
حجازي وجع فجعتن

وتقول العرب قديماً قصمنجي .. على وزن افرنجي ..
وكذلك قصمنجيه .... على وزن افرنجيه ..
امنية: ودي اتعلم اللهجة القصمنجيه واتكبر على الشباب
توم وجيري باللهجه القصيميه

شباب الدمام :
رهيبين في نفس الوقت..
بس كرهونا في مطعم الطازج كل مره وعازمينا فيه ..
ياشباب استحو غيرو المطعم وماعندهم سيره الا سوق الراشد

اهتماماتهم: يجيد البعض منهم التحدث باللغة الروسية والاوكرانية والاشتراكية
وجميع دول الاتحاد السوفيتي السابقة بطلاقة.
هذي والله اخرة التسدح في فنادق البحرين
انا مو ذابحني الاحسدهم لشباب جدة .... بس ودي اعرف عليه ايش تحسدونا ....

على الغجر والا الكورنيش والا الزحمة والا الحفر بالشوارع والا الخدم اللي عندنا.
احنا المفروض نحسدكم على الهدوء على الكورنيش على المطار اللي عندكم.

المطار ما ودك الا تنام على ارضية الصالات ... والا اجمع عيال الحارة واطلقهم في صالات المطار للعب الكورة بدل ما يكسروا سيارتنا

يعني الواحد في الدمام اذا طلع بنت معاه .. محد يدري فيه ...
لا من شاف ولا من دري ..وتحصله خايف لا ينكشف ..
لكن عندنا ينزل له اعلان في الجريدة ويتصلوا عليه اصحابه كلهم ويتلقى التهاني والتبريكات (في الغرفة عند الهيئة) .. فرجاءاً ياشباب لاتحسدونا ... على إيش يا حسره.... مافيها مجال للحسد ... وريحونا من كلمة ياحظكم ياشباب جدة

نصيحة: مافيه نصيحة ياشباب لانها مشفره مع باقة الاوائل..
ماعاد فيه شي ببلاش

شباب الباحة :

ونعم الشباب .. ولكن يلاحظ عليهم كثرة الحسد ونقل الكلام

"سعيد ظهر له كامري جديده وفيها بيجر ياحظه" ....
يقصد جرس السرعة.....
واليوم الثاني المسكين سعيد يسوي حادث بالكامري ويصدم في بيته

نصيحه : في كلمة جميله لازم تستخدموها اذا شفتو اي حاجه اعجبتكم
قولوا ماشاء الله تبارك الله

شباب جيزان :
ما ام خبر قماعه ؟؟ يعني مدري كيف ابدا معاكم لكن دعوني احاول

عينات كثيره من شباب جيزان خاويتهم وعشت معاهم..
كنا اذا طلعنا نتعشاء سوا وبعد مانطلب ونأكل ونجي عند النقطة الحساسة الا وهي الحساب تعال شوف الاعذار .. والله نسيت ام محفظه !! والله مابش صرف

في بعضهم اعوذ بالله فيه لؤم وخبث ويبيع صاحبه عشان فلوس او عشان مصالحه
وفيه فئه مشوهه صورة شباب جيزان بصورة كبيره لدرجة انه يسرق فلوس من محفظة صاحبه اللي ساكن معاه

هواياتهم : تخزين قات .... يشاهد مباراة لازم قات ..
جلسه وسهر وفيها ضحك لازم قات .. لعب ورقه لازم قات .. السفر لازم قات .......
من جد كيف نعيش بلا قات ..... زي دعاية كيف نعيش .. بلا كابريس

واللي شدني انه لديهم انواع مختلفه من القات مثل : القات الحرامي القات جي ال اكس - قات عيد العمال - قات العودة المدارس- قات الهكرز العربي - قات اعقلها وتوكل ...... لدعم الحملة الوطنية للتآمين !! - قات وفنيله علاقي وفوطه ....
صار فلم مصري !! القات انواع كثيره ماشاء الله

والكثير منهم يعتبرو محترفين في لعبة "الكيرم"..... طلعوني من اول ماتش

نصحية: الوصول إلى هذه النصيحة غير مسموح به .. الرجاء منك أنك تأخذ لفه وتحط ملفك عندنا .. وهذا وجهي لواتصلنا عليك

الخاتمة
من الكلام السابق والاصناف المتعدده التي ذكرتها راح يتبادر للقارئ
اني متعمد الإساءه لشباب بلدي ..
ولكن أنا ذكرت بعض العينات والتصرفات
التي لانستطيع أن ننكر وجودها في مجتمعنا ‘
وقطعاً لم اعمم هذه التصرفات
على بقية الشباب لتأكدي بأنه هناك الكثير من الشباب فيهم الإستقامة والصلاح
وجميع الصفات الحسنه..
ولكن احياناً يتم الحكم على سائر الشباب بتصرف مجموعة بسيطه ترتكب الاخطاء ومن ثم يتم اصدار الحكم بأن شباب السعوديه فيهم وفيهم ..
ولكن هذه هي طبيعة البشر

فمثلاً لو جاءنا شخص من المريخ (مثلا) وكان محترم و متدين وكريم .. الخ من الصفات الحميدة .. وتعاملنا معه ولمسنا فيه هذه الصفات الحميدة ..
بعدها راح تكون الفكرة لدينا والتي تكونت من خلال تعاملنا معه بأنه شباب المريخ فيهم الخير والصلاح ...
لو تلاحظو انه احنا تعاملنا مع شخص واحد وما نعرف صفات البقية
منهم ولكن اصدرنا الحكم عليهم بالصلاح بتصرف شخص واحد منهم

اللي ابغى اقوله انه كل واحد منا دائماً في حياته وتعامله مع الاخرين بيكون سفير للمجتمع الذي ينتمي له ..
فلو كل واحد منا احسن التعامل مع الآخرين و تمسك بدينه دائماً لاعطى صورة مشرفه لمنطقته والذي بدوره ينعكس على السعودية بشكل عام
وسامحوني اذا اخطيت

المصدر: منتدى الخليج