منتدى الخليج - وشهو تعريف المحال ؟

جاني واحد قال : بسأل كم سؤال ..
وقبل يسأل قلت : أنا ماني خبير !!

قال : جاوب بس ، ياولد الحلال ..
وكل كلمه حطها فبيت صغير ..

قال نبدى : وشهو تعريف المحال ؟!
قلت : خل هالكلمهــ فــ البيت الأخير ..!

القهــر؟: إن شفت دمعـات الرجال ..
والوطن؟ : ( إنسان ) .. مِتغيِّر كثير ..
والطفل؟ : لعبه على شاطـي الرمال ..
والأمل؟ : إحساس في عين الضرير ..
الوفا؟ : [ قلبين ] .. يجمَعهُم حلال ..
والرَجُل؟ : اللـي علـى أهلـه يغير ..
والرجا؟ : لا قلت : {للواطـي}تعال ..!
والفشل؟ : مدري .. ولكنـه مرير ..
والشعر؟ : في وقتنا .. بدر وطلال ..
زين وأوَّل؟ : حيـل يعجبنـي جرير .. !

والغلا؟ : إحساس إلى حَـد الخيال ..
والعِشِق؟ : لا شفت مَعشُوقِك تطير ..
والجفا؟ : إعكس مفاهيم / الوصال ..
والوَصِل؟ : يعنـي تأكَّـد فيك خير ..
والعقل؟ :تِسْفَـه أقاويـل <الجهال> ..
والجهل؟ : إن قلت عن نفسك كبير ..
والخطر؟ : لا صار ما عندك مجال ..
والبلا؟ : إن صرت معدوم الضمير ..
والعجب؟ : لا صرت تسأل منهو قال ..؟
والتعب؟ : إن كنت تِبْحَثْ عن مصير !!
الغنى؟ : بالنفس ما هو راس مال ..
والفقر؟ : من كان .. بأعماله فقير ..

يكفي يكفي أسئلة إنهي الجدال ..
ويالله علمني عن السر الخطير ..
ماأبي تضرب لي في غيرك أي مثال ..
قول : عنك واعتبر سرك في بير ..
جات طعنه من جنوبك والشمال ..
يعني وضعك بين من حولك خطير ..
صاحبي وإن ضاقت بعينك ليال ..
لك فرشت القلب مفروش الحرير ..
في [ بلاد الحلم ] .. ممنوع العقال ..
والمصيبة الشعب مااختار الأمير ..
وماألومك .. كان شديت الرحال ..
دام بيتك جرح \ وفراشك حصير ..

هذا تعريفي إلى كلمة : مُحَال
شي ودِّك فيه ولا يمكن يصير ..!!!!