الأزواج والإستراحات

قـائـمـة الأوسـمـة · #1

الأزواج والإستراحات)))

السلام عليكم ورحمة الله وبركاته

على بركة الله نبدأ موضوعنا اليوم عن (الأزواج والإستراحات )

نريد من الأخوات حمايتنا من (جمع المذكر الغير سالم )

إبتداء لابد أن نعلم أن مكان الرجل في الأصل خارج البيت وكل زوجة ودها تربط زوجها بحبل بالبيت لازم تعرف هذا

لكن وما أشد ما بعد لكن المشكلة إن بعض الرجال راح بالحبل معه للإستراحه وربط نفسه هناك

عاد أبقول للرجال شيء ترى الحرمة تكره الإستراحة تخاف وراها زواج مسيار لو تطمن من هالنقطة كان تخف عليك شوي

عاد بعض الزوجات الله يهديهن نكدية زوجها مايرتاح في البيت أبد بعدين يهرب للإستراحة لأن العامل اللي فيها يقول له سم يابابا وهي تقول له معصي

بعدين بعض الأزواج زوجته مقصصة جنحانه ماله قدر وإذا راح للإستراحة صار هو الآمر الناهي أكيد هذا بيهرب للإستراحة

كثير من الحريم إذا اتصلت تشكي زوجها لابد تقول زوجي يسهر بالإستراحة ودي أقول لكل زوجة أول ماتتصل أعرف زوجك يسهر بالإستراحة عطين اللي بعده

عاد المشكلة اذا صارت الزوجة بعيدة عن أهلها في منطقة ثانية وزوجها ماغير (يتبطح) بالإستراحة مايجي إلا للنوم ونفسه بطرف خشمه

معقولة بعض الأزواج يجلس بالأيام ما أكل من طبخ زوجته لأنه يفطر بالدوام ويتغدى ويتعشى بالإستراحة ؟

يعني معقولة أيام الأسبوع كلها في الإستراحة طيب متى مثل هالنوعية يشوف حاجت زوجته وعياله ؟

والمشكلة إذا قالت زوجته نبي الشي الفلاني قال أنا مشغول مشغول وين ؟ بالإستراحة

وليته إذا راح يجي بدري لا مايجي إلا متأخر وبعدها نومة لا صلاة ولا عبادة حتى يجي وقت الدوام وزوجته في جهاد معه لإيقاظه للصلاة والدوام

أخي الزوج ترى الزوجة ماتبي غير زوج يتفرغ لها أوقات معينه يقضي حاجتها وحاجات عيالها وتحافظ على الصلاة بس هذا كل اللي تبيه

عاد إذا جينا لبلاوي (بععععععض) الإستراحات فحدث عن ذلك ولا حرج اللهم ياكافي

والله أن بعض الأزواج كان طيب وخلوق ومن حين طاح بالإستراحة طاح له بصديقٍ شيطان خربه على زوجته وعلى عياله

عاد (المعسل) شغال بهالإستراحات وإذا رجع لبيته ريحته خايسه زعل على زوجته ليش ما تعطرين لي ؟

عاد تراي أكره الحرمة اللي تعتقد أن الإستراحة والفساد قرينان لا ينفكان ماهو لازم لكن بعض الأزواج فعلاً فاسد

المشكلة بعض الأزواج كل راتبه يحطه بالإستراحة إذا طلبوا عياله شيء قال مامعي

عاد الحريم بهن حقهن باديات يستاجرن إستراحات والله لو يسوقن كان زوجها يطلع للإستراحة وهي وراه مع صديقاتها

المشكلة أن بعض الإستراحات فيها شيبان ما يطلعون منها أربع وعشرين ساعة يوم شاب ودوه الكتاب

عاد إذا واحد منهم بالإستراحة شكى لهم إن زوجته ماتبغاه يكثر الطلعة للإستراحة قالوا له (إدعس على خشمها لاتهمك ) وصايا شيطانية

المشكلة أحياناً يصير واحد منهم داشر ويخرب كل اللي في الإستراحة والدليل أن البعض ما طاح في الدخان (وغيييييره) إلا بعد دخوله لعالم الإستراحة

المشكلة إن الزوج يسميها إستراحة والزوجة تسميها شقاوة

طيب الزوج إذا كان دايم يسهر بالإستراحة إذا كبروا عياله له وجه يمنعهم وهو دايم ما يجي إلا نصف الليل

عاد هالنوعية دايم يقول لزوجته نامي عند أهلك والله أن بعض الزوجات تقول بديت أستحي من أهلي من كثر ما أنام عندهم

إطلع للإستراحة ماقلنا شيء إحرص على الصحبة الطيبة لا تسهر كثير وخلص مشاوير وطلبات عيالك كذا ما أحد يمنعك

بعضهم يطلع من الدوام ويجي للبيت وينام حتى آذان العشاء بعدين يطلع للإستراحة حتى يأذن الفجر يعني عامل الإستراحه يشوفه أكثر من عياله

إذا مريت من عند الإستراحات وشفت كثر السيارات اللي واقفه عندها تدرك حجم المأساة

المشكلة بعض الأزواج يقول إذا ما طلعت للإستراحة وجودي كعدمي في البيت الحرمة ما غير تلاحق بزرانها وأنا مالي كرت يعني عطيه شوي إهتمام حتى ما يطلع

بعدين الزوجة ما يصلح تعالج مشاكلها بالصراخ والنياح كأنها عسكري إذا جاء زوجها يطلع للإستراحة جربي طرق أخرى فهي عبادة ومجلبة للزوج

الغريب أن بعض الأزواج هو اللي يشتري أغراض الإستراحة كلها وبيته كأنه مسجد مافيه شيء أبد

وبعضهم إذا اعترضت زوجته على كثرة طلعاته للإستراحة قال وش ناقصكم ؟ ناقصهم أنت يالحبيب

المشكلة أن البعض يطلع من بيت مرتب وجميل ويروح لإستراحة كأنها خرابة دائماً أسأل نفسي ليش ؟ الظاهر يهج من الذيب اللي في البيت

عاد إذا راح للإستراحة ليته يخلي جواله مفتوح سبحان الله يحتاجونه عياله بل (إن الهاتف المطلوب لايمكن الإتصال به الآن ) الوعد نص الليل يفتحه

تقول له زوجته تعال حرارة الولد مرتفعة يعني ظرف طاريء يرد عليها ماهنا إلا العافية بعدين يسكر جواله

عاد إذا رجع من الإستراحة آخر الليل وزوجته نايمه قال ليش ما تستقبلينن وإن حصلها صاحية قال صاحية تراقبين متى أجي ؟ أنت وش تبي بالضبط؟

يعني يصير ياجماعة يفهم نفسيات زملائه بالإستراحة أكثر من فهم لنفسيات عياله ؟

عاد ما شاء الله ما تسمع إلا ضحكته بالإستراحة وإذا دخل بيته كأنه داخل على أحد يعزيهم

يعني حتى لو سهرت حاول تعوض زوجتك وعيالك بالكلام الزين وتشوف طلباتهم

الله وأعلم لو تصير مسؤولة فسوح بناء الإستراحات في البلدية حرمة والله ما تفسح ولا لإستراحة

الغريب نشوف سيارات الصبح عند الإستراحات بوقت الدوام يقولون أنهم يطلعون من الدوام للإستراحة هو صدق ؟

عاد العزابية في الإستراحات ماودي أقول شيء الله يصلح الحال بس

يعني بالله عليكم حوش فيه غرفة بس ودورة مياه ومطبخ صغير ويستأجره شخص كبير مع شاب صغير ليش؟

قسماً بالله يقول لي شخص تائب ماعرفت الدشارة إلا عن طريق الإستراحات ماعليها حسيب ولا رقيب

قنوات مفتوحة شراب ترى ماهي شراب الرجلين وبلاوي هذا هو محتوى (بعععععععض) الإستراحات

هذه الإستراحات أصبحت الحاجة ملحة لضبطها من قبل الجهات المسؤولة عنها

القضية أبعد من هروب زوج للإستراحة القضية لها تداعيات أخلاقية وأسرية هذا هو العلم اللي يجمد على الشارب

كلنا نرتاد الإستراحات حديثي ليس في تجريمها وإنما حديثي المطالبة بتصحيح أوضاعها

لا يفهم البعض تجريم كل الإستراحات وروادها فأنا مع بعض الأصدقاء نرتادها لكن مطالبتي بتقنين إرتيادها وضبطها هل هذا صعب ؟

العلاج يبغى طولة بال من زوجها مدمن إستراحات ودعيه بابتسامة واستقبليه كذلك داومي على ذلك لا تنتظري منه جزاء وحاسبين بعدها على النتيجة

أصلح الله الجميع وغفر لنا ولكم آمين يارب العالمين

المصدر: منتدى الخليج

#2

يسلمو شمس
على هذا الطرح ويعطيك ألف عافية

قـائـمـة الأوسـمـة · #3

من جد مشكله كبيره طلعات الازواج الاستراحات
الاربعتء الخميس اطلع اسهر مارح تمنعك الزوجه بس البعض دايم وينسى ان انساان متزوج وعنده مسوؤلية
تسلمي ع الطرح
ويعطيك العافيه